هنا صوت حسن ومرقص وكوهين..من لندن

صورة الست المذيعة بيتهيأ لي اسمها سونيا جراهام

في لندن كل شيء جايز حتى الذئب والحمل ممكن يعيشوا في "عشة". تخيل يا مؤمن، مسلمين ويهود عملوا محطة إذاعة "سوا سوا". واشتغلت من عشرة أيام، وكمان سموها "سلام- شالوم".

المحطة بقى بيديرها "مرقص"، سوري، قصدي شخص مسيحي..وبيقولوا أن هدفها التعايش بين أبناء العمومة، ولاد عمك إبراهيم يعني.
الاذاعة بتبث من بريستول، والغريب، يا سيدنا، أنها جذبت مستمعين من خارج بريطانيا، وقال إيه بيوصلها "إيميلات" من القاهرة وجاكرتا، وفلسطين!!

والايميلات دي بيرد عليها الحاخام ناتان ليفي (كوهين)، وفاروق صديق (حسن) عضو المجلس الإسلامي في بريستول، وماسك الإدارة والهندسة الإذاعية، (مرقص) الجنوب أفريقي كيل حانان".

موقع الإذاعة على الانترنت بيقول أن الفكرة راودت المجموعة السنة اللي فاتت، لما تزامن هلال شهر رمضان مع رأس السنة اليهودية (روش هشانا- دي كلمة بالعبري فذلكة يعني).

وقرر سكان بريستول 30 ألف مسلم، و10 آلاف يهودي إقامة حفلة بهذه المناسبة. وبعد فترة دبت في دماغهم فكرة إذاعة حسن ومرقض وكوهين.

الاذاعة رافعة شعار عايز تذيع قول ذيع، أي حد يعمل اللي هو عاوزه في برنامجه. المسلمين ليهم برنامج واليهود ليهم برنامج، وكل واحد حر في برنامجه. لكن كله إلا النشرات. دي بقى ممنوع تتكلم في السياسة، هما نشرتين الأولى يقدمها مسلمون، والثانية يقدمها يهود. وموضوع الاقصى والهيكل ده يعكنن على التعايش فبلاش منه.